أنا عارف اني سارق العنوان من علاء -يا رب يطلع بقى- بس ملقتش حاجة توصف أحسن من كدة
واحد صاحي الصبح زيك, غسل وشه زيك, راح أكل زيك, شد في الكلام مع اهله زيك, لبس هدومه زيك, عامل حسابه على حاجات يعملها و مواعيد بعيدة زيك, عنده أحلام زيك, عنده بنت بيحبها أو نفسه يتكلم معاها زيك, ضوافره طويلة و عايز يقصها زيك, ملقاش اللبس اللي كان عايز يلبسه زيك, نزل الشارع زيك, هتف ضد العسكر زيك, عنده أماني للبلد زيك, عنده وطنية و اخلاص زيك, قعد يغني اغاني الالتراس و يشتم الداخلية و المجلس زيك, قعد يغني أغاني الشيخ امام زيك, قعد يدور على بطانية عشان ينام زيك, لما بيدخل اللجنة بيطلع البطاقة و يضحك زيك, كان بيستأذن من الاعاشة عشان عبوة عصير زيك.
و صحي على صفافير و تصقيف و أمن زيك, و جري للخط الولاني زيك, و هتف ضد المشير زيك, و اشتبك مع الأمن زيك, و قال للبنات ارجعوا زيك, و حاول يتفادى الغاز زيك.
المشكلة الوحيدة ان بعد كل ده انتا اللي مش زيه.
حلو انك تبقى قاعد مع شهداء و تاكل و تشرب معاهم و تتكلم و تضحك و تهزر بس صدقني كل اللي هتحس بيه هو شرف انك عرفته, عايز تبقى زيه خليك حد زيك.
