Thursday, July 7, 2011

تجميع التويتات من ندوة التحضير ليوم 8 يوليو بمركز هشام مبارك

. : التدريب عبارة عن معلومات، عشان تبقى صاحب حق. 
. : احنا مش نازلين نتظاهر بلطجة، انتا بتستخدم حق من حقوقك و محدش يقدر يمنعك منه. 
. : من حق الحكومة أنها تنظم الحق مش تحظره، فا تجريم الاعتصامات ممكن يخلص في أي محكمة 
. : لازم يبقى معاك تحقيق شخصية. لو شايل يافطة ده حقك و محدش يقدر ييجي على حقك. 
. : قانون الاجراءات الجنائية، القانون 24 مكرر يلزم أي شخص يفضح عن شخصيته لو سالك على إثبات شخصية 
. : لازم لو حصلك حاجة تركز في التفاصيل، الشكل، الرتبة، الوقت و المكان. 
. : محدش ليه حق يعتدي عليك بالكلام، خلي صاحبك معاك عشان يكون فيه شهود 
. : لو كنت في النيابة لازم تذكر الألفاظ حرفيا، مفيهاش كسوف. 
. : لو تعرضت لاعتداء بدني، روحوا لاقرب طبيب خاص و اطلب منه تقرير و وثقه 
. : لو إتقبض عليك؛ السكوت و الهدوء. متتكلمش مع حد متعرفهوش عشان ممكن يبقى مخبر. 
. : قانون الاجراءات الجنائية بيقول ان حقهم حجزك 24 ساعة بس. لو كان زيادة روح للمحامي بتاعك لو أتعرضت على النيابة متأخر تقول 
. : وقت القبض عليك ده من ساعة ما وقفك في الشارع. 
. : لو صادر ممتلكاتك الشخصية لازم تأخذ إيصال. 
. : الحاجات لازم تتأكدوا منها عشان ممكن يدشوا حاجات. 
. : مينفعش يحبسوك مش عاجبك و ليك الحق عشان ممكن يكون فيه مسجلين خطر 
. : مش المفروض ان عينيك تتغمى أو تم تقيذك من رجليك أو رجلك لازم تقول في النيابة. بس لازم الأول تطلب المحامي بتاعك و متقولش حاجة 
. : لما يقولك هل لديك أقوال أخرى في آخر المحرض لازم تقول كل الاعتداءات بالتفاصيل. .
. : متمضيش على ورق مقرتهوش. دي كلها تهم تخويف، متخفش في جبهة الدفاع عن المتظاهرين. 
. لو أتعرضت على النيابة قول اسم أي محامي من جبهة الدفاع. 
. : لو اتاخدت منك البطاقة، مش مشكلة هتطلع بضامن. 
. و طلبت محامي متعرفش شكله و جالك اطلب إثبات شخصية. 
. لازم الناس تكون هادية عشان كلنا هننزل هاديين. محدش يردد كلام من غير ما يتأكد، فزع و خلاص. 
. اليوم ده هيكون فقط للثورة و نبطل المناقشات الجدلية 
. محدش يتحرك بشكل فردي. متاخدش فلوس كتير. خليكوا حافظين رقم عشان الطواريء. 
. : الأكل، الاعتماد الأساسي هو السكريات. بار الحلاوة يكفيك طاقة يوم كامل. لمرضى السكر أحسن حاجة التمر. النشويات مهمة. 
. : خلي معاكوا علبة فوار بس خذوها أول ما تصحوا مش قبل النوم. المية و العصاير مهمين 
. : الحمامات، الرجالة أمرهم سهل، البنات؛ كل مجموعة تتجمع و تعرف أقرب صديق ليه بيت قريب. 
. : لازم تلبسوا حاجة مريحة في رجليك و بلاش جزمة كوتشي لو هتقعد في الاعتصام عشان العفانة. أحسن حاجة جزم باتا. 
. : مهم توافر الشرابات. 
. : أكتر منطقتين هيساعدوك على منع ضربة الشمس ورا ودانك و قفاك، بلهم. 
. : ممكن لو مجموعة كبيرة ممكن تشتري خيمة، أو معكش فلوس هاتوا أربع عمدان خشب و تغطوها بملاية 
. : الكهرباء: اي عمود نور بيكون فيه سلوك مفكوكة. ضور على الأحمر و الأزرق. تجيب كبل طخين. و هيوصل لمشترك 
. : مفيش كهرباء للساعة 5 العصر و ده وقت التوصيلات. 
. : Sleeping bags; if you couldn't get one. خلي معاك كوفرتة دايما. لو نمت أول يوم على الأرض مش هتقدر تكمل. 
. : شارك في اللجان الشاعبية أو أعمل أي حاجة عشان الناس تحس انك منهم. 
. لو هتصور في ظروف خطر؛ لازم تكون لابس غامق. ميكونش في المحفظة غير البطاقة. خلي الفلوس في حتة تانية. 
لو هتصور دائما سيب صف أو صفين قدامك. كدة نسبة ان حاجة تيجي عليا 30%. 
. دائما أسئل ايه إلي حصل؛ عشان بعد سنة الناس مش هتكون فاكرة. لازم تأخذوا شهادات. 
. متصورش متظاهر بيعمل حاجة ممكن يتعاقب عليها متصورهوش. زي بتاع بندقية الغاز إلي اتجاب من بيته. 
. قرار انك تصور ده بيكون على حسب الموقف. مفيش حاجة اسمها تصريح تصوير، غير في مناطق الجيش إلي ممنوع فيها التصوير. 
. الناس أكتر حد ممكن يدافع عن حقك في التصوير. 
. ملخص: الثبات، لازم أجيب الطرفين، كل مشهد لازم يوصل معلومة، بحكي قصة من لقطة 5 ثواني. 
. : أهم حاجة في التعامل مع قنبلة الغاز انك متخفش منها، متجريش، أمشي مش أجري عكس اتجاه الهوا.
. : لو عايز ترجع رجع، أهم حاجة مفيش مية تدخل جوا عنيك. البيبسي بيخلي الغاز يلزق. استخدم مية بس أبعدها عن عينك. البصل أحسن حاجة. 
. : لو سيس، أمسح وشك بديتول و بعديها زيت زيتون. بيعمل عازل. 
. في حد بيقول محدش يشوط القنبلة بتخلي الغاز ينتشر أكتر. 
. : إلي يتعب بعد الغاز يأخذ محلول جفاف، أو يأكل موز و جوافة كتير. . 
. : لو هتشوط القنبلة؛ لازم تكون أول أو آخر صف. عايز تبطل مفعولها حظ عليها جير. 
. : محدش يجري. دي 4 مرة يقولها. محدش يكتم نفسه، لما هتيجي تتنفس هتاخذ غاز أكتر. 
. : حل الزور زيت الزيتون. الستربسلس و البرادورال غلط. 
. : العسل الأبيض بردو فعال لو زورك وجعك 
. : ننتبه للزيت لو رجعنا الضرب غلط. لازم أول دش يكون مية ساقعة و منحفش في الحمى. 
. : جربنا نطفي القنبلة بالمية. واحد بيقول الدخان بيهدا بس مش بيوقفها.
. : أسرع حاجة تطفي القنبلة الجير أو رمل و كبوا عليها مية. 
. : لما يكون في غاز محدش يخش عمارة، يا أما هيتقبض عليك يا أما الغاز هيزيد و هيبقى غلط عليك. 
. : لو حد جه يجر شكل معاك في نقاشات، أسئله عن الحياة في الميدان أو اللجان و متفكرش انك تقنع حد، ده مش وقت نقاش سياسي. 
. : يا ريت لو في صور اشتباكات و فيها وش واحد محدش يطلعها. غير لو كان اشتباك يدوي أو الشخص ملثم. 

للي مش فاهم كل ده عن ايه يشوف اللينك ده http://malek-x.net/drupal/node/701

و الله الموفق
Posted by at

No comments:

Post a Comment

Subscribe to: Post Comments (Atom)