لماذا خنع الشعب المصري؟ كسل؟ خوف؟ ضعف؟
أنا فعلا مستغرب.. هل الناس مش شايفة اللي بيحصل ولا مش عايزين يشوفوا ولا شايفين و عاملين فيها مش شايفين؟ هل النخوة و الكره لوجود سلطة قمعية اختفى؟ فين الحرية اللي طالبنا بيها؟
صحي من النوم لبس و قال لأمه أنا نازل قالتله ربنا معاك.. نزل صلى الجمعة و بدأ يمشي.. شوية و وصل الكوبري و هناك كان نهاية شاب كان ممكن يكون بيننا دلوقتي و كان ممكن يكون رئيس مصر في يوم من الأيام أو عالم يخدم البلد بس أصحاب الكراسي قرروا يحرموه من حياته و من كل الامكانيات اللي قدامه عشان هما عايزين كدة.
اللي بيحصل دلوقتي هو أن أنا مش شايف ان الحرية اللي الناس ماتت عشانها احنا عايشينها.. ليه يتفض اعتصام ميدان التحرير سواء اتفقت أو اختلفت عليه؟ هو مش المجلس كفلنا حق التظاهر و الاعتصام السلمي؟ ايه اللي حصل مش سلمي؟ هتقوللي قفل الميدان هقولك ده مش حاجة غير سلمية و لا تبرر التدخل العنيف اللي حصل.
ليه التحرير اتحول ثكنة عسكرية؟ كنا بنتضايق لما حد شرطة كان بيقولنا وريني البطاقة قبل الثورة دلوقتي الجيش بيقبض من غير بطايق. من الكسبان من كمية القبض ديه؟ و ازاي احنا ساكتين يا مصريين؟ هو بقى في حظر تجول في التحرير و أنا مش عارف؟
ليه أمن الدولة رجع يلعب بديله؟ ليه احنا متراقبين؟ ليه مفيش مصري حاسس بأمان في وطنه؟ ليه بيخوفونا ان ننزل نقول رأينا؟ ليه طلب الحق مبقاش حق؟
أنا بكتب التدوينة ديه و أنا حاسس بعار و حاسس باحساس لا يوصف من الامتعاض. هل الناس قررت أن مش مهم دم الشهداء؟ بلاش ديه.. اوزنوها كدا, الناس دي ماتت على ايد نظام بائد لسبب.. لأن اللي كانوا عايزينه كان صح. و دلوقتي لسا الصح مش بيتعمل.
الأوساخ اللي نزلوا فضوا الاعتصام و اعتدوا على اهالي الشهداء بالضرب و السب في اول أيام رمضان أحب أقولهم انتو هتعيشوا بقيت حاياتكوا ندمانين على اللي انتو عملتوه ده. مش بس قهرتوا أم شهيد على ابنها بس, انتو قهرتوها على ان اللي ابنها راح فداه كان هدر و أن دمه سال في صحرء جيفاء متستاهلش.
أهلي دايما بيقولولي حاجتين.. متغلطش في حد في التدوين و ماتنزلش لا يتقبض عليك. أنا عندي مشكلة الحاجتين دول أنيل من بعض و يستوجبوا النزول للشارع. لما يكون عندنا سلطة مقدسة مبتغلطش و لو غلطت ماينفعش ننتقدها يبقى فين الثورة؟ و لو أنا بيتقبض عليا عشان بقول رأيي بحريتي يبقى فين الثورة؟
حاجة بقى عن حبيب قلبي الاعتصام أو كما سماه مهند @mand0z الاعتصام الاكبر. الاعتصام نجح.. أيوا نجح حتى لو كانت أعداده قليلة و مفيش اجماع جماهيري عليه.. شوفوا كيفية فض الاعتصام و توقيته و توابعه و مدته. شوفوا كم الاعتقالات. شوفوا عدم التعليق الغير مبرر من المجلس أو سيادة الدكتور عصام شرف. احنا نجحنا في شوية حاجات فاضل لسة كتير.
الناس اللي هتقعد على كنبها الصبح تتفرج على مبارك في القفص يا ريت تفتكر ان في 11000 واحد في سجون عسكرية هما اللي عملوا ده و نبقى قلالات الأصل لو معملناش كل حاجة عشان نحرر اخواتنا
أنا مش قصدي أكون متشائم نس انا فعلا مقروف ان الشعب اللي عمل معجزات مش عارف يعمل السهل أو مكسل.. عيب.. عيب و الله.
أنا عارف ان افكاري مش مرتبة و التدوينة مش ماشية بأي ترتيب بس هو طرح أفكار.
الثورة لم يضيعها الثوار.. الثورة أضاعها كل من لم يطالب بمطالبها.
No comments:
Post a Comment