Friday, January 6, 2012

ليه تسليم السلطة لمجلس الشعب يوم 25 يناير؟ #TasleemSolta

بدايةً كدا.. أنا ضد الانتخابات و قاطعتها. 

معلش هطول عليكو شوية بس هتكلم في الموضوع كله مرة واحدة.. هبدأ بشرح المبادرة و بعدين هتكلم في نقط الخلاف اللي جمعتها من ناس كتير.

طيب المبادرة بكل بساطة ان يتم تسليم السلطة لمجلس الشعب المنتخب من الشعب يوم 25. رئيس مجلس الشعب في خلال 60 يكون عمل انتخابات رئاسة و الدستور يتكتب بعيد عن العسكر.

ليه أنا شايف ان المبادرة ديه هتكون أنجح من غيرها؟ لأن بكل بساطة قطاع كبير جدا الشعب "مقتنع" بالانتخابات و شايف ان هي اللي هتحقق "الاستقرار." البدائل المطروحة كلها حلوة عالورق أو نظريا لكن شبه مستحيلة التحقيق و ليها مية مليون وسيلة تتهبط بيها.. زي معضلة المجلس الرئاسي المدني اللي كنا داخلين فيها من فبراير لما بعد 8 يوليو.

أنا سئلت على تويتر ايه اللي الناس معترضه عليه في المبادرة و كانت كل الاعتراضات حول الاعتراف بشرعية الانتخابات, الإخوان و الاسلاميين, و لو مجلس الشعب موافقش.

أول نقطة:
أنا شبه متأكد ان الانتخابات كان فيها تزويرات كتير.. لو مش عالورق هيبقى في التضليل في موضوع الرموز. المهم, نفس القطاع اللي مقتنع بالانتخابات اللي هو كبيـــــــــــــر جدا خلاص اعترف بشرعية الانتخابات للأسف. و بعدين الخوف على مجلس شعب جه في حكم العسكر انه يكون تحت حكم العسكر, لكن لما يكون تحت حكم الثورة الشعبية الموضوع هيكون مختلف جدا. تاني حاجة ماشي أنا متفهم المنطق بس يا جماعة مش هنفضل احنا نفكر بطريقة احنا اللي صح و بقيت الشعب مش فاهم, هو آه ممكن نكون صح بس كدا احنا بنتحول لنخبة عايزة تعمل اللي هي عايزاه. احنا نشوف الاختيار الشعبي و نزقه حبتين.

تاني نقطة هي هي تالت نقطة تقريبا:
الإخوان. الإخوان باعوا دم الشهدا. الإخوان عملوا صفقة مع العسكر. الإخوان مضللين. الخضيري (اللي الإخوان هيرشحوه لرئاسة مجلس الشعب) قال "هنكسب ايه لما المجلس يتحاكم؟" الإخوان هيسمحوا بالاخروج الآمن. الإخوان مش مع تسليم السلطة لمجلس الشعب. 

جميل الكلام ده و مقدرش اختلف مع اللي بيقوله في حاجة بس تعالوا نبص بصة كدة, كل الكلام ده هيتغير لو اتطلب بجدية من الشارع تسليم السلطة لمجلس الشعب. ليه؟ لأن أولا الإخوان لو رفضوا (و مستحيل لو لقوا مظاهرات حاشدة) هيبقوا حطوا أول مسمار في نعشهم السياسي. ثانيا في تيارات ثورية جوا الإخوان و مقتنعين. ثالثا الكلام عن محاسبة المجلس و الخروج الآمن و الصفقة ده كله ملهوش لازمة لأن لو فعلا تم الضغط هتتغير موازين العملية السياسية و الشعب هو اللي هيؤمر و مجلس الشعب ينفذ. موضوع باعوا دم الشهدا و باعوا الثورة عشان مقاعد مجلس الشعب اتفق تماما. بس دم الشهدا احنا اللي هينضيعوا أو نجيبله حقه بأيدينا, مجلس الشعب ملهوش دعوة.

السلفيين مش هتكلم عليهم أصلا لأن هتطلع فتوى بحرمانية الخروج عالحاكم و طبعا مش هتفرق خالص مع الناس اللي نازلة.

موضوع ان البرلمان سلفي اخواني. طب ما هو كدة كدة سلفي اخواني لو عملنا ايه. مش معنى ان رئيس مجلس الشعب هيستلم السلطة انه ليه مطلق الصلاحيات. لأ هو شغلته يعمل انتخابات بجانب مهامه الطبيعية اللي كدة كدة كان هيعملها.

يا ريت لو في نقطة أنا مغطتهاش أو اعتراض يتكتب و أنا هرد عليه لو عندي رد.

شكرا و آسف على الإطالة.
و الله الموفق و المستعان, على العسكر.


5 comments:

  1. اولا الي باع دم الشهدا علشان كرسي مستعد يعمل اي حاجه علشان يحافظ علي الكرسي ده فلو شايف ان مصلحته في صفقة المجلس العسكري هيقف في صفه وهو شايف فعلا كده
    ثانيا انت بتقول احنا نشوف الاختيار الشعبي و نزقه حبتين مين قالك ان حل تسليم السلطه للمجلس الشعب هو الاختيار الاكثر شعبيه - انا عملت استفتاء سريع ايام اعتصام مجلس الوزرا علي الموجودين تسليم السلطه لمين قليل جدا الي اختار مجلس الشعب معظمهم اختار مجلس رئاسي او مجلس من الثوار

    ReplyDelete
  2. أول نقطة أنا رديت ليها فوق, الصفقة بعد التسليم هتكون في ايدينا ان نلغيها بسهولة.

    قصدي بالاختيار الشعبي هو اعترافهم بمجلس الشعب. اعتصام مجلس الوزراء اللي أنا كنت مشارك فيه كان مكان ثوري للغاية, و كل آرائه جميلة بس مش هتقنع الأغلبية اللي مصر محتجاهم ف لازم نزق في الحتة اللي هتحشد ناس حتى لو في خيار أحسن شوية.

    ReplyDelete
  3. الناس في مصر هترضي باي اختيار تختاره ويجتمع عليه عدد من الثوار لانهم واخدين علي الاستقرار وعايزين العسكر يمشوا وبس باي وسيله, قليلين جدا الي عندهم تصور لتسليم السلطه وده معناه اننا نختار الخيار الافضل حتي لو كان صعب شويه, لو مجلس ثوار مش هيحتاج كل شويه نفكرة بالمطالب ونعمل اعتصامات ومظاهرات كثير علشان نضغط عليه , لو مجلس الشعب ازاي تضمن تنفيذ مطالب الثورة دون التلاعب بها

    ReplyDelete
  4. لازم الاول الاخوان يفهموا انهم بالاغلبيه اللى اخذوها فى الانتخابات ممكن يتحرقوا .لازم يعرفوا ان الناس اختارتهم وده رصيدهم وقوتهم واصبحوا الان كيان شرعى وعلشان يحافظوا على الرصيد ده لازم النحياز للثوره بخطوات سريعه يشعر بها الناس

    ReplyDelete
  5. @Ahlam: للأسف أختلف معاكي لأن الناس حاسة ان احنا بنحاول نمشيهم على مزاجنا. و ده جزئيا صحيح. أنا شايف ان لازم نشوف الشعب و عايز ايه و نصحح مساره سِنة. مجلس رئاسي أو مجلس ثوري تعب دماغ بالاضافة لأنه شبه مستحيل و هندخل في معضلة التوافق على أشخاص.

    @Amr: للأسف الإخوان مش هيعملوا كدة لوحدهم.. لازم نغصبهم على الانحياز لصفنا.

    ReplyDelete