ليه التحرير؟

قبل ما أبدأ أنا عايز أقول إن أنا أصلاً أهلي معارضين نزولي التحرير.

بالصلاة على النبي كدة التدوينه ديه بالعامية عشان دي تاني مرة اكتب بالعربي و الاتنين في نفس اليوم.

يوم ١٢ فبراير رحنا نضفنا الميدان و هناك شفت شاب لسة بيكتب يافطة عشان لسة قاعد في الاعتصام و طبعاً كان فيه هجوم حاد عليه مني و من إلي حوالية. لو الشاب ده بيقرا التدوينة بقوله أنا أسف أنا مكنتش فاهم حاجة و انتا صح. 

الهتاف الموحد لما قبل موقعة الجمل كان "الشعب يريد إسقاط النظام" بعدها كان "الشعب يريد إسقاط الرئيس" و هنا أنا شايف إن احنا كنا غلط. حسني مكنش عمره النظام حسني كان رأسه. و ده إلي مسوحنة دلوقتي.

أنا هخليني صريح و أقول أصعب حاجة بالنسبه لينا دلوقتي مش المجلس ولا الداخلية ولا "العجلة"، أصعب حاجة هي حزب الكنبة. يوم ٢٥ إللي خلانا نبقى فعلاً "ايد واحدة" إن كان في شبه إجماع شعبي على إن في فساد و إلخ. إلي أنا مستغربه إن هي هي نفس المطالب لأن مفيش حاجة حصلت. بس أنا مقدر إن في ناس كتير حالتها وحشة و كدة كتير عليها و مش قدرة و أنا مقدرش اغلط واحد بيدور على أكل عيشه. أنا بس إلي متدايقلوا إن الناس ديه هي هي نزلت يوم ٢٥ و مفكرتش لا في كل ولا شرب ولا حياة، لأن كان عندهم هدف و غاية عن إقتناع و تجربة.

للاسف الناس معدتش بتسأل بقوا بيحكموا و خلاص. أنا هاتكلم في شوية نقاط عشان مش عايز أطول و أبقى سخيف.

الشرطة: حدث ولا حرج، ولا اقلقوا مش هحدث أكيد انتو شايفين إلي أنا بشوفه.

المحاكمات:  دي بقى هحدث، في نقطتين؛ أولاً في فرق كبير بين التأني و التباطؤ يعني الناس إلي بتقول بياخدوا وقتهم عشان يثبتوا التهمة أحب أقولهم بطلوا ترددوا كلام و خلاص، مشاء الله القضاء عندنا شغال أسرع من من المتظاهرين إلي بيجروا من الغاز في حالة محاكمة أي مدني محاكمة عسكرية و في من ده أمثلة: عمرو البحيري، طارق شلبي و أخر الضحايا لؤي نجاتي؛ و دول مش بلطجية و لأ مش أكيد عملوا حاجة غلط و لأ مش أكيد يستاهلوا.. و ده ياخدنا لي تاني نقطة، ليه المحاكمات العسكرية؟ الكلام بتاع احنا دلوقتي تحت حكم عسكري فبيطبق القانون العسكري أحب أقول إن ده رزع. حسني إلي كان أنيل كان عسكري و مكنش في محاكمات عسكرية لمدنيين، و بعدين هو الدستور ده زي شهادة البكالريوس بيتعلق علي الحيطة و خلاص؟

الفلوس: أيوا الفلوس، الناس كلها بتقول الحكومة هتجيب فلوس منين يا عيني؟ دي دايرة على كوم لحم. سؤال رفيع سوغنطوط: الامن المركزي بيتدعم ليه؟ ليه كمية الغاز ديه بيتم تزويدها للجهاز إلي ملهوش ٣ لزومات على بعض؟ ليه حسني بيتدفعله من فلوس الشعب ما يقرب من المليار جنيه شهرياً عشان ميتسجنش؟ احنا نزلنا نقشر جزر في الميدان ولا إيه؟ يا سيادة الدكتور المبجل عصام شرف الشعب أولى.  

أنا مش عايز أطول و مش عايز الناس تزهق بس أنا جوية كلام كتيييير عايز أقوله و مش عارف.

أنا عايز أنزل التحرير عشان أنا بحب أحرض الناس و عشان أنا بلطجي و عشان أنا مدفوعلي و عشان أنا عايز البلد تخرب. ناس كتير هتقول إن أنا نازل عشان كدة بس والله أبداً. أنا عايز أنزل عشان أنا مصري، عشان أنا مش شايف إن في تغيير، أنا عايز أنزل عشان المجلس العسكري -و عن تجربة- تم إثبات إنه مش بيعمل حاجة غير بضغط شعبي، أنا عايز أنزل عشان حق ٢٠٠٠٠ بيتحكموا في محاكم عسكرية، أنا عايز أنزل عشان مصر ديه جميلة و عايز أنزل عشان أنا مش عجباني الداخلية و شايف إن لازم تتنفض و تتشال و تتحط و تتنفض تاني و مش هيبقى كفاية و نبقى نشوف ساعتها هنعمل إيه، أنا عايز أنزل عشان أنا لسة عايش و ناس زي و زيك ماتوا عشان كانوا فاكرين إن ده هيصلح حاجة في البلد فأنا نازل عشان أصلح مش أبوظ.

التحرير إسم على مسمى، عايز تعرف إيه إلي بيحصل إنزل إسأل البلطجية/المحرضين/الجواسيس/المخربين/الاحرار هما هناك ليه و بطل تحط رجل على رجل و تحكم على الناس. مصر ولادة يا بشر و خيرها في أهلها مش سلطتها. 

السلام عليكم. عقبال ما أشوفكم في دولة مدنية.