Tuesday, July 12, 2011

ليه الاعتصام؟

كل يوم بتكلم في نفس الكلام فا قولت اكتبه عشان أنجز.

بالصلاة على النبي كدة أنا بنزل التحرير تقريبا كل يوم لحد انهاردة.. عشان أبويا حط عليا عقابات رادعة غير منطقية من وجهة نظري فا أنا هكتب التدوينة ديه عشان أقول اللي أنا شوفته يمكن اهل حد تاني يقتنعغوا و ينزلوه.

أنا فقدت الإحساس بالوقت فا معلش لو مش قادر أجيب تفاصيل. أولا أنا عايز أقول إن الميدان أمان جدا ما عدا اللي حصل انهاردة في طلعت حرب و بردو الموضوع اتلم برا الميدان.

تاني حاجة, روح الميدان رجعت بشراسة.. الناس أغلبها و أكرر أغلبها رجعت تتعامل بمنطلق و أيديوليجية واحدة.. في البوست ده أنا هركز أكتر على الإجابيات أكتر من السلبيات..

قبل الإعتصام اتكلمت مع ناس كتير كانوا ضد الإعتصام سواء كانوا مع المظاهرات أصلا أو ضدها. أنا مازلت محترم ارائهم بس أنا لسا عند رأيي و مع الاعتصام.. مع كامل احترامي لكل الناس بس أنا شايف ان الناس المعترضة على المظاهرات أصلا مقسومة نوعين. النوع الأول هو النوع اللي بيسمع كلام و يمشي وراه و خلاص و من ده كتير في مصر. زي دعاة الاستقرار و العجلة و "الاستعجال" و ان الجيش حمى الثورة. النوع التاني هو النوع الأناني اللي هو كان بينزل في الاعتصام الأول عشان يتصور و يغير البروفايل بيكتشر و يكتب على البي بي انه في التحرير, و النوع ده دلوقتي معترض عشان عايز يسافر و يخرج عشان هو في أجازات.

أنا اتكلمت في كذا تدوينة عن اللي انا بسميه (الغباء التفاعلي السياسي) اللي سبحان الموفق بيحصل بحرفة و حنكة شديدة و بنظام متتابع و اللي بيكون جزء كبيرجدا من الحشد في الميدان و بيكون ليه تأثير أكبر من محاولات المعتصمين للحشد. يعني مثلا بعد الخطاب الأول للدكتور شرف العدد زاد و بعد التاني العدد زاد.

ندخل بقى في موضوع الدكتور شرف. أنا شخصيا بحترم الراجل جدا و حاسس من ناحيته براحة نفسية و حاسس انه عايز يعمل حاجة, بدليل ان سلطاته مقيدة فا اللي قدر يعمله انه بيسافر يجيب فلوس. أنا اتفق جدا مع الناس اللي بتقول ان شرف لازم يستقيل بس مش عشان هو اداءه وحش بس عشان الراجل ده ميتقلش في التاريخ ان قامت ثورة ضده لسوء الأحوال.

المجلس بيه العسكري, بالصلاة على النبي أنا عجبني جدا موضوع اللواء الفنجري ده.. هما هنا سمعوا الشعب, من كام يوم تساءل علاء الأسواني عن عدم ظهور اللواء الفنجري مع انه من أكثر الوجوه المرحب بيها في الشارع المصري. اللي حصل مع اللواء الفنجري هو ان زي بالضبط لما تسيب الكيكية وقت زيادة في الفرن, وشها بيتحرق.

أما عن التعديلات الوزارية انا شايف ان خلاص فات الأوان عليها و هي أساسا مش من المطالب الأساسية زي ما المخلوع رايح مغير نظيف و جاب شفيق و المطلب كان انه يغور في داهية. زي ما فريق كورة يخسر و يعد يغير في الادارة الفنية و هو أصلا معندهوش ولا لعيب.

النقطة الشائكة بتاعت المجمع: أنا هقول بس حاجة صغيرة الميدان ماشي بنظام غير مركزي و كل الناس للأسف بتعمل اللي هي عايزاه بس ده لا يمانع اني جزئيا معترض على قفل المجمع.. انا مع ان لازم يكون في تصعيد و مع ان لازم يكون في ضغط كبير جدا على المجلس العسكري بس شايف ان لو هيكون في تصعيد ميكونش على مؤسسة خادمية و هي ديه أصلا نقطة الاعتراض. عامة هو خلاص المشكلة اتحلت و المجمع هيتفتح الاربعاء و الخميس.

يا ريت الموضوع ده نبطل نتكلم فيه, أنا معاكوا ان اللي غلط لازم يتحاسب (ده لو فعلا قفل المجمع غلط مش مجرد انه رأي مختلف عن رأيك) بس مش وقته.. دلوقتي لازم كلنا نرجع نركز في المطالب الأساسية اللي المجلس أو الوزارة لم يقتربوا من تحقيقها ولو بخطوة.

نقطة أخيرة و ملخبطاني.. أغلب الهتافات في الميدان تتعلق بزوال حكم المجلس العسكري. مثل "يسقط يسقط حكم العسكر" "الشعب يريد اسقاط المشير" "الجيش المصري بتاعنا.. المجلس مش بتاعنا" "كلمة في ودنك يا حربية, احنا اللي ضربنا الداخلية" "دكتاتور دكتاتور و المشير عليه الدور"  المؤكد هو أن مع استمرار التباطؤ/التواطؤ من المجلس العسكري سوف يرفع سقف المطالب لا محالة و ساعتها لن يلوم المجلس الا نفسه.

نفسي المجلس يمشي بمبدأ اللي يتلسع من الشوربة ينفخ في الزبادي.

و الله الموفق

No comments:

Post a Comment