أنا هتكلم في شوية نقط و يا ريت نفتح نافوخنا شوية.
الميدان:
الميدان فيه باعة جائلين و في أوقات كتير مش نظيف و بتحس انك في "مولد." الكلام ده كله صح. الميدان ده دولة مستقلة بذاتها, زي ما في بياعين برا الميدان هتلاقي جوا الميدان و مش حقنا نطردهم عشان كده هنكون بنتعارض مع واحد من أهم المطالب و هو (العدالة الإجتماعية). أنا شخصيا رأيي ان لازم يكونوا على أطراف الميدان و ده اللي بيحصل أوقات الحشود الكبيرة.
النضافة.. الميدان بيتنضف كل يوم الفجر و الله بس الناس بتبهدل الدنيا و معدش في لجان بتلف تنضف طول اليوم للأسف و قبل ما تنتقض نظف انتا, مش الميدان ده بتاعنا كلنا؟ حد ممكن يفهمني اشمعنا الميدان هو اللي حارقكوا نضافته أوي كدة؟ و نفس الشخص هتلاقيه بيرمي الزبالة عاااادي جدا في الشارع في أي حتة تانية.. لو هنتكلم على أخلاقيات الميدان, ابدأ بنفسك و بطل ترمي و ساعتها مصر كلها هتكون ميدان نظيف.
المولد.. أيوة مولد و ليه لأ؟ بلدنا و احنا حرين.. بس الناس اللي عاملين "مولد" و مش عاجبينكوا, بيكونوا أول واحد بيرد بجرأة, و نكر للذات شديد على قبنلة الغاز بطوبة.. ولا بيدخل يجيب المصابين من قلب الضرب بدون تفكير.. سيبهم يفرحوا, الميدان للجميع.
انتقد و تذمر.. بس السؤال, استفدت أو أفدت الميدان أو مصر بإيه؟ بلاش انتقاض و دور على حاجة تعملها.
ده بوست صغير بعد ما قريت تويتاية من شخصية انتقاضية غير بناءة.
No comments:
Post a Comment