ليه؟

بالصلاة على النبي, انا بكتب التدوينة دي و انا في معركة شرسة مع عيلتي لنزولي ميدان التحرير لأن هما من الاخر شايفين ان الاعتصام في الميدان غلط مع تشعب الآراء و نقاط الخلاف.

أنا مش هتكلم على العباسية عشان الصراحة الكتاب كلهم استفاضوا.. أنا بس هستعير شوية نقاط وأنا بكتب.. هبدأ بمقارنة شوية حاجات يمكن الصورة اللي في مخي توضح.

1-     يوم 28 و 29 يونيو بان جدا بالصور و الفيديوهات استخدام نظام الشرطة البائد للبلطجية المأجورين المدككين بالأسلحة و المولتوف لمهاجمة المتظاهرين اللي نزلوا بعد ما الداخلية هجمت بدون أي مبرر على ميدان التحرير. هاج و ماج الرأي العام و الشارع المصري على اللي حصل لأن ده جزء من أفعال النظام السابق. اللي حصل في العباسية كان أقبح, لأن مجلسنا "حامي الثورة" ساعد البلطجية على نفس طريقة الداخلية على الهجوم على متظاهرين سلميين لهم حق كفله لهم اللي منعهم. الأغرب هو تبرير البعض للي حصل على ان 1- وزارة الدفاع خط أحمر (مع توضيح الفرق بين الجيش و المجلس و توضيح ان المسيرة رايحة هناك عشان المجلس مش الجيش) 2- كفاية كدة بقى.. استنوا الرئيس و الانتخابات و هو يبقى يصلح (مش عارف تعريف ثورة ايه بالنسبة لقائل المقولة دي) . 3- المجلس مش هيسمح لنفسه يحصل فيه زي اللي حصل للداخلية. انا عايز أقف عند رقم 3 عشان عندي نقتطين.. معنى ان حضرتك تقول انه مش هيسكوت و تقارنه بالداخلية ده معناه انك معترف انه ماشي غلط و انت ساكت على كده, تاني حاجة انك شايف و معترف ان ديه سلطة قمعية و متمسكة بمكانها رغما عن أي شيء و مستعدة تضحي بأي حاجة. و مع كل ده حضرتك ساكت و موافق. لا تعليق.

2-     هستبدل كلمة حرية و أقول قمع الرأي و الصحافة.. ايام المخلوع كان الإعلام عبارة عن أداة لتخميد أي نوع من أنواع الكرامة عند أي مواطن. دلوقتي الوضع اختلف جدا, بعض وسائل الإعلام المقروئة و المسموعة كل اللي بتعمله انها بتحاول واعية انها تلعب على الناحيتين.. مع الثورة شوية و مع قرارات المجلس شوية. انا فصلت بين الاتنين عشان للأسف قرارات المجلس لا تتماشى مع مطالب الثورة. الانقصام ده اللي سبب انقسام في الاراء جوا الشارع المصري.

اللي حصل مع دينا عبد الرحمن ده انا مش هقدر أوصفه بلفظ محترم لأن مفيش دولة محترمة بيحصل فيها كدة ابدا. أنا مش هتكلم على أشخاص أنا هتكلم عن منظومة اسمها المجلس العسكري القائمة بعمل رئيس الجمهورية بطريقة مذرية. اللواء الرويني جزء من فريق يعمل عمل واحد و عدم التصريح برفض أو الإعتذار عن تلك التصريحات معناه الموافقة بالأغلبية. ده تاني حاجة أنا شايف ان مينفعش يتسكت عليها. (أنا لا أحبذ فكرة الاطاحة بالمجلس العسكري, للتوضيح)

ليه الناس ساكتة؟

1-     كتير من الناس مش فاهمة الناس في التحرير ليه. ديه أنا مقدرش ألوم فيها المعتصمين عشان لو أي واحد بيعرف يقرا و يكتب نزل هيشوف مئات اليفط توضح الناس ديه قاعدة ليه. أنا شخصيا بلوم وسائل الاعلام و الناس اللي مكسلة تنزل تشوف بعنيها.

2-     جملتين بيعصبوني جدا.. "دي مش الناس اللي كانت في الميدان يوم 25" و "الميدان متبهدل و مش نضيف و مفيش نفس قيم الميدان." ردا على اول جملة, لو حضرتك مقتنع بكدة انتا\انتي شوفتيني أنا في الميدان أيام 25؟ لو أه كنت لابس ايه؟ لو لأ يبقى مش مقياس لأن أكيد انتا\انتي معملتوش حصر للناس. و أغلب الناس اللي بتقول كدة منزلتش الميدا ن اليومين دول أصلا. تاني جملة بقى, أولا الميدان بيتنضف كل يوم. ثانيا لسا مش عاجبك ساعد في تنضيفه. ثالثا انتا لو شايف ان "قيم" الميدان مش موجودة أحب أقولك انتا غلطان, روح عند لجان التفتيش و اعمل فيها متعصب من التفتيش و شوف كام واحد هييجي يبوس راسك و يقولك احنا اسفين.

3-     انا مش بحب أخش في النقاش بتاع مفيش فلوس ده عشان مش هقعد كل 3 دقايق أقول ان ميدان التحرير ملهوش دعوة. الدور و الباقي على المجلس العسكري اللي هيحاكم مبارك في شرم و هيضرب السياحة.

4-     موضوع بقى اسرائيل اللي على الحدود و صربيا اللي في ترعة المريوطية ده كلام الصراحة انا شايف ان ملهوش أي لازمة.. و تفتكروا الشباب اللي ضحوا بنفسهم عشان حرية فكرية مش هيتوانوا عن التضحية بنفسهم عشان حرية اراضيهم؟ الكلام ده كله ملهوش لازمة و ملهوش اي نتايج ايجابية.

انتا لو بتقرا و ساكت هسألك ليه ساكت و لو مش ساكت اسأل اللي حواليك انتو ليه ساكتين؟ غمض عينك و افتكر وش شهيد و افتكر بعديها منظر أب او أم بيبكوا و قلبهم محروق مش بس عشان ابنهم\بنتهم استشهد\ت بس عشان اللي قتلهم قاعد في شرم بيتخدم عليه مش مرمي على أقل تقدير في السجن فضلا عن معدوم. فين القصاص؟ فين الحرية اللي الناس ماتت عشانها؟ فين المؤسسة الأمنية اللي بتحترمني أنا و حقوقي؟ فين الحاكم اللي فعلا بينفذ اللي الشعب اللي شغله الشغلانة دي عايزه؟ فين الثورة؟

لو فضلت تفكر بنفس فكر الاستقرار المزيف أو سيناريو الناس الجعانة انزل التحرير و شوف بنفسك و بطل كلام عمال على بطال. و من رأى منكر فليغيره بنفسه مش يعد على الكنبة و يقول الناس ديه ياي مش حلوين.

اعمل حاجة لبلدك و انزل هات حقك و حق اللي ماتوا عشان تقدر تنزل تاخد حقك. استقيموا يرحمكم الله.